നടനും തിരക്കഥാക്കൃത്തുമായ വിഷ്ണു ഉണ്ണികൃഷ്ണൻ 2003 മുതൽ മലയാള സിനിമാ മേഖലയിൽ പ്രവർത്തിക്കുന്നുണ്ട്. റിലീസിനൊരുങ്ങുന്ന കള്ളനും ഭ​ഗവതിയുമാണ് താരത്തിന്റെ ഏറ്റവും പുതിയ ചിത്രം. ഒരുപാട് സിനിമകളിൽ കള്ളന്റെ വേഷത്തിലെത്തിയ താൻ മലയാള സിനിമയിലെ കള്ളൻ വേഷത്തിന്റ ബ്രാൻഡ് അമ്പാസിഡർ ആണെന്നാണ് സ്വയം വിശേഷിപ്പിക്കുന്നത്.

കള്ളനും ഭ​ഗവതിയും സിനിമയുടെ പ്രമോഷന്റെ ഭാ​ഗമായി ഏഷ്യാവില്ലയ്ക്ക് നൽകിയ അഭിമുഖത്തിലാണ് താരം സിനിമയിലെ തന്റെ വേഷത്തെക്കുറിച്ച് സംസാരിച്ചത്. ”മാത്തപ്പൻ എന്നാണ് എന്റെ കഥാപാത്രത്തിന്റെ പേര്. കഥാപാത്രത്തെ കുറിച്ചുള്ള വിവരങ്ങൾ തിരക്കഥയിൽ തന്നെ വിശദമാക്കിയിട്ടുണ്ടായിരുന്നു. എനിക്ക് ഇത് ഒരു പുതിയ അനുഭവമാണ് കള്ളനും ഭ​ഗവതിയിലെയും കള്ളൻ. ഞാൻ കള്ളൻമാരുടെ ആജീവനാന്ത ബ്രാൻഡ് അമ്പാസിഡർ ആണെങ്കിലും ഇതിലൊരു പുതിയ കള്ളനാണ്”- വിഷ്ണു വ്യക്തമാക്കി.

ചിത്രത്തിൽ ഭ​ഗവതിയുടെ വേഷത്തിൽ അഭിനയിക്കുന്നത് ബം​ഗാളി നടി മോക്ഷയാണ്. സിനിമയിലുടനീളം ഭാഷയറിയാത്ത ഒരു നടിയുടെ കൂടെ അഭിനയിക്കാനായതും തന്നെ സംബന്ധിച്ചിടത്തോളം പരിചയമില്ലാതിരുന്ന കാര്യമായിരുന്നു എന്നാണ് വിഷ്ണു പറയുന്നത്. ഡയലോ​ഗ് പഠിക്കാനും മറ്റുമായി സിനിമയുടെ സംവിധായകൻ തന്നെ നായിക മോക്ഷയ്ക്ക് വർക്ക്ഷോപ്പ് തയാറാക്കിക്കൊടുത്തിരുന്നു.

മോക്ഷ വളരെ ഡെഡിക്കേറ്റഡ് ആയിരുന്നു. ഭ​ഗവതിയുടെ കിരീടമെല്ലാം അപാര ഭാരമുണ്ട്. അതെല്ലാം വെച്ച് രാത്രിയും പകലും വെയിലത്തെല്ലാം അവർ അഭിനയിച്ചു. ഭ​ഗവതിയുടെ വിശ്വരൂപം കാണിക്കുന്ന രം​ഗം മലമ്പുഴ ഡാമിലായിരുന്നു ചിത്രീകരിച്ചത്. ആ സമയത്ത് അവരെ സഹായിക്കാനൊന്നും ആരുമുണ്ടായിരുന്നില്ല. വളരെ എഫേർട്ട് എടുത്തിട്ടുണ്ട്. പോസ്റ്റർ എല്ലാം കാണുമ്പോൾ, എവടന്ന് കിട്ടി ഈ ഭ​ഗവതിയെ എന്നാണ് എല്ലാവരും ചോദിക്കുന്നത് തന്നെ- വിഷ്ണു വ്യക്തമാക്കി.

അനുശ്രീയാണ് ചിത്രത്തിലെ മറ്റൊരു താരം. ചെറിയ ഒരു ഇടവേളയ്ക്ക് ശേഷം ഈസ്റ്റ് കോസ്റ്റ് വിജയൻ സംവിധാനം ചെയ്യുന്ന ഏറ്റവും പുതിയ ചിത്രമാണ് കള്ളനും ഭ​ഗവതിയും. ഈ മാസം 31ന് തിയേറ്ററുകളിലെത്തുന്ന സലിം കുമാർ, ജോണി ആന്റണി, പ്രേം കുമാർ, രാജേഷ് മാധവൻ, ശ്രീകാന്ത് മുരളി, ജയശങ്കർ,നോബി, ജയ്പ്രകാശ് കുളൂർ, ജയൻ ചേർത്തല , ജയകുമാർ, മാലാ പാർവ്വതി മുതലായ അഭിനേതാക്കൾ ശ്രദ്ധേയമായ വേഷങ്ങൾ കൈകാര്യം ചെയ്യുന്നുണ്ട്.