ടെലിവിഷൻ പ്രേക്ഷകർ മുഴുവൻ ഏറെ ആകാംക്ഷയോടെ കാത്തിരിക്കുകയാണ് ഏഷ്യാനെറ്റ് സംപ്രേക്ഷണം ചെയ്യുന്ന ബി​ഗ് ബോസ് സീസൺ അഞ്ചിന് വേണ്ടി. ഇപ്പോഴിതാ, കാത്തിരിപ്പുകൾക്ക് ഒടുവിൽ പരിപാടിയുടെ ലോഞ്ചിം​ഗ് തിയതി പുറത്തുവിട്ടിരിക്കുകയാണ്. മാർച്ച് 26ന് രാത്രി ഏഴ് മണി മുതൽ ഉദ്ഘാടന എപ്പിസോഡിന്റെ സംപ്രേക്ഷണം തുടങ്ങും. ഏഷ്യാനെറ്റിന് പുറമെ ഡിസ്‌നി പ്ലസ് ഹോട്ട് സ്റ്റാറിൽ ബിഗ് ബോസിൻറെ 24 x 7 സംപ്രേക്ഷണവും ഉണ്ടായിരിക്കും.

‘ബാറ്റിൽ ഓഫ് ദി ഒർജിനൽസ്, തീ പാറും’ എന്നാണ് ഇത്തവണത്തെ ബി​ഗ് ബോസിന്റെ ടാ​ഗ് ലൈൻ. ഇത് സൂചിപ്പിക്കുന്നത് പോലെ തന്നെയാകും മത്സരാർത്ഥികൾ എന്നാണ് വിലയിരുത്തലുകൾ. മത്സരാർത്ഥികൾ ആരൊക്കെയെന്നത് അറിയാൻ കഴിയാത്തത് പ്രേക്ഷകരുടെ ആകാംക്ഷ പതിൻമടങ്ങ് കൂട്ടുകയാണ്. കഴിഞ്ഞ വർഷങ്ങളിൽ നിന്നും തികച്ചും വ്യത്യസ്തരായ മത്സരാർത്ഥികളാകും ഇത്തവണ ബി​ഗ് ബോസിൽ എത്തുകയെന്ന് നേരത്തെ പുറത്തുവിട്ട പ്രമോകളിൽ സൂചിപ്പിച്ചിരുന്നു.

വ്യത്യസ്‍ത മേഖലകളിലെ കരുത്തരായ മത്സരാർത്ഥികൾക്കൊപ്പം, എയർടെൽ മുഖേന പൊതുജനങ്ങളിൽ നിന്ന് ഒരാളെ തിരഞ്ഞെടുക്കുന്നു എന്ന പ്രത്യേകതയും ഈ സീസണിനുണ്ട്. എന്തായാലും സോഷ്യൽ മീഡിയ പ്രവചനങ്ങൾ സത്യമാകുമോ ഇല്ലയോ എന്ന കാര്യം അറിയാൻ ഉദ്ഘാടന എപ്പിസോഡ് വരെ കാത്തിരിക്കേണ്ടിയിരിക്കുന്നു.

കഴിഞ്ഞ നാല് സീസണുകളിലും ഷോയുടെ അവതാരകനായി എത്തിയ മോഹൻലാൽ തന്നെയാണ് ഈ സീസണിലും ബിഗ് ബോസിനെ മുന്നോട്ട് നയിക്കുക. മുംബൈ ഫിലിം സിറ്റിയിലായിരുന്നു നാലാം സീസണിനുള്ള സെറ്റൊരുങ്ങിയത്. ആദ്യ സീസണും മുംബൈയിലെ സെറ്റിലായിരുന്നു സംഘടിപ്പിച്ചത്. എന്നാൽ സീസൺ രണ്ടും മൂന്നും ചെന്നൈയിലെ ഇവിപി ഫിലിം സിറ്റിയിലായിരുന്നു സംഘടിപ്പിച്ചത്. ഇത്തവണ എവിടെയാവും ലൊക്കേഷൻ എന്ന കാര്യം വ്യക്തമല്ല.

ഒരു കൂട്ടം മത്സരാർത്ഥികൾ പുറംലോകവുമായി യാതൊരു ബന്ധവുമില്ലാതെ കുറച്ചുനാൾ ഒരു വീട്ടിൽ ഒരുമിച്ച് ജീവിക്കുക എന്നതാണ് ബി​ഗ് ബോസ് ഷോ. ഓരോ ആഴ്ചയും മത്സരാർത്ഥികൾക്കിടയിൽ വോട്ടെടുപ്പ് നടത്തുന്നു. ഏറ്റവും കൂടുതൽ നാമനിർദ്ദേശങ്ങൾ ലഭിച്ചവരെ പുറത്താക്കുന്നതിനായി പ്രേക്ഷകർക്കും വോട്ട് രേഖപ്പെടുത്താവുന്നതാണ്. ഒരാളൊഴികെ എല്ലാ അംഗങ്ങളും പുറത്താകുന്നതുവരെ വോട്ടെടുപ്പ് തുടരും. ഏറ്റവുമൊടുവിൽ വീട്ടിൽ അവശേഷിക്കുന്നയാളെ വിജയിയായി പ്രഖ്യാപിക്കുന്നതോടെയാണ് ബിഗ് ബോസ് അവസാനിക്കുന്നത്.